Гузариш ба мундариҷаи асосӣ
Telecom Zehn амнияти киберии худро мустаҳкам мекунад ва ҳамкории стратегӣ бо шарикони Кореяи Ҷанубӣ оғоз мекунад
Бозгашт ба навидҳо

Telecom Zehn амнияти киберии худро мустаҳкам мекунад ва ҳамкории стратегӣ бо шарикони Кореяи Ҷанубӣ оғоз мекунад

ҶСК «Тоҷиктелеком»

Нашр шудааст 30 Июл 2026

Ширкати Telecom Zehn, ки фаъолияти худро дар доираи лоиҳаҳои ҶСК «Тоҷиктелеком» амалӣ менамояд, аз анҷоми бомуваффақияти сафари корӣ ба шаҳри Сеули Ҷумҳурии Корея хабар медиҳад. Дар ҷараёни ин сафар дар самти амнияти киберӣ ва ҳифзи маълумоти корпоративӣ як қатор тавофуқоти муҳим ба даст омаданд.

Дар доираи сафар мутахассисони Telecom Zehn таҳти роҳбарии коршиносони пешбари соҳа дар самти амнияти киберӣ ва ҳифзи маълумоти корпоративӣ омӯзиши тахассусӣ гузаштанд. Ҳайати намояндагии ширкат ҳамчунин бо роҳкорҳои муосири технологӣ дар самти тасдиқи шахсият бидуни истифодаи рамз ва нигоҳдории бехатари маълумот шинос гардид.

Дониш ва таҷрибаи амалии бадастомада аллакай барои таҳкими низомҳои дохилии амнияти иттилоотии ширкат мавриди истифода қарор доранд.

Натиҷаҳои асосии сафар

Дар натиҷаи сафар Telecom Zehn бо шарикони кореягӣ як қатор созишномаҳои тиҷоратӣ ва ғайритиҷоратиро ба имзо расонд:

• Ҳамкорӣ бо DualAuth. Telecom Zehn бо ширкати кореягии DualAuth — таҳиягари роҳкорҳои муосир дар самти тасдиқи мутақобилаи шахсият ва ҳифзи маълумот — созишномаи ҳамкорӣ ба имзо расонд.

• Узвият дар Passwordless Alliance. Telecom Zehn ба иттиҳоди байналмилалии Passwordless Alliance пайваст. Ин иттиҳод созмонҳои кишварҳои гуногунро бо мақсади рушд ва пешбурди технологияҳои тасдиқи шахсият бидуни истифодаи рамз, ки ба стандарти байналмилалии ITU X.1280 асос ёфтаанд, муттаҳид менамояд. Telecom Zehn мақоми узви расмии иттиҳодро соҳиб гардид.

Самтҳои минбаъдаи ҳамкорӣ

Дар доираи тавофуқоти бадастомада, ҷонибҳо татбиқи ташаббусҳои зеринро ба нақша гирифтаанд:

  1. Барномаҳои омӯзишӣ оид ба Passwordless X.1280 — баргузор намудани давраҳои омӯзишӣ дар Тоҷикистон оид ба хизматрасонии тасдиқи шахсият бидуни истифодаи рамз. Ин хизматрасонӣ барои платформаҳои онлайнии B2C дар саросари ҷаҳон ба таври ройгон пешниҳод мегардад.

  2. Омӯзиш дар самти ҳифзи маълумоти тиббӣ — роҳандозии барномаҳои Protect Medical Data барои муассисаҳои тиббии кишвар бо мақсади баланд бардоштани сатҳи ҳифзи маълумоти шахсии беморон.

  3. Мутобиқсозии AutoPassword — ҷорӣ ва мутобиқ намудани маҳсулоти AutoPassword-и ширкати DualAuth ба талаботи бозори маҳаллӣ, аз ҷумла ҳамгироии он бо низомҳои дохилии Telecom Zehn.

  4. Ҷорӣ намудани FilingBox ва рушди FilingCloud — татбиқи роҳкори FilingBox барои нигоҳдории бехатари маълумоти корпоративӣ, инчунин таҳия ва такмили сохтори маҳсулоти FilingCloud-и ширкати DualAuth бо дарназардошти хусусиятҳои бозори маҳаллӣ.

Аҳамияти ҳамкорӣ

Ин ҳамкорӣ барои Telecom Zehn дар самти рушди хизматрасониҳои амнияти киберӣ дар Тоҷикистон имкониятҳои нав фароҳам меорад ва барои ба сатҳи стандартҳои байналмилалӣ баровардани ҳифзи маълумоти ширкат ва муштариёни он замина мегузорад.

«Ҳамкорӣ бо шарикони кореягӣ танҳо мубодилаи технологияҳо нест, балки саҳми арзанда дар таҳкими амнияти рақамии тамоми кишвар мебошад», — таъкид намуданд дар ширкат.

Поделиться новостью